我本身喺 九龍坑新圍 嗰邊租咗村屋，因一啲事情喺8月尾退租，退租後喺8月28日交吉返畀業主，業主喺收樓時並冇提及有任何問題，並喺第二日退返大部份按金畀我，唯獨係扣起咗我「$5000」，話因為仲有一期電費未出，要嚟扣返「水電等費用」，到時冇問題就會退返餘額畀我。
咁如事過咗兩個半月，我喺前幾日就whatsapp業主，業主回覆：
「電费$482，但發現有多處地方要執修，包括二樓房間兩個煙霧感應器，牆身，厕所窗台，冷氣機，地面污渍及地下地台擅自便改物料等，故剩餘$4518我將不退還，以作執修之用」(原文轉錄)
1）煙霧感應器： 入住冇幾耐已經有一個喺度響唔停，當時因為太煩所以拆咗落嚟，並有立即同業主講，業主有回覆話：
「Ok, 但請你keep住個煙霧感應器唔好掉」（原文轉錄）；
2) 牆身：冇錯我係有上電視嘅入牆釘，當時我都準備咗叫朋友掹返啲釘同批返好幅牆，但業主收樓冇提出所以交咗樓就冇整；
3）厕所窗台：呢個我一直都唔覺有爛到，直至業主畀張圖我先知，交吉時亦冇提出，同埋我有買家居保險，如果真係意外損毀咗，當時可以報畀保險賠，但依家2個幾月問咗保險都話應該冇辦法；
4）冷氣機，地面污渍：呢兩個我真係黑人問號，如果交吉時有不滿，我其實願意當佢面沫返乾淨佢；
5）地下地台擅自便改物料：我認我係有鋪到膠地板喺佢啲地上面，但如果有不滿於交吉時提出，我願意幫佢拉返走啲膠地板再清返啲膠水跡（問過師傅話用松節水唔難處理）；
其實$5000蚊又唔算多，係條氣唔順，同埋因為我已經暫時離開咗香港，都應該要一段時間先返嚟處理，睇怕都係畀佢硬食$5000，所以睇吓喺度取唔取倒暖。
業主畀我嘅相我怕係私隱，不便公開，唯有喺度公開啲地產現時放租公開嘅相畀大家睇睇。
大家睇倒灰灰地色嗰啲就係我鋪嘅膠地板，其實都幾靚仔的，不過如果業主於交吉時講唔like要我還原，我都會尊重合約精神還原返，兩個月後租唔出先講，我又唔喺香港咯，真係局我硬食。
所以大家交收時一定要做呢三樣嘢，唔好好似我咁蠢
第1: 一定一定一定要簽返好「完全交收同意書」簽返名作實，大家日後唔好再有爭議；
第2: 唔好畀業主用水電費做藉口hold起按金，其實係可以即刻抄錶計價畀埋尾數；
第3: 有乜唔啱就當面講清講楚，唔好事後唔滿意先提出
#九龍坑村屋 #元嶺村屋 #大埔村屋 #無良業主 #無理扣按金 #九龍坑新圍
